مدري شبيه ادوخ خلاف عينك
احاجي بصورتك وانشدهه وينك
واشوفنك خيال بصفي بس من نور
واخافن من خيالك يفضح المستور
وارسملك صور من ماي عالحيطان
ما اكدر الون والعذر مجبور
ولا اكدر اسولف بالدمع للناس
وكف بين الرمش والعين صدك سور
تكتب دمعتي حرف اسمك من اتطيح
وتسج درب الحزن وي كل جرح مفطور
لا تسمع حجي وكت السوالف راح
ولا ترجه السوالف من كلب مجمور
ولتعاتب دليلي وآنه كلي جروح
احير بياهو منهن واعتنيلك زور
احير بشوكي الك بس ما اكلك ليش
لو احير بدمعتي وخاطري الم**ور
ادير العين واركض طيفك اتلكاه
بس طيفك طلع بالحلم فد مغرور
كلما ادنه منه يروح عني بعيد
لا لفني ويه طوله ولا صرت مشمور
لا يرضه ابتعد لا يرضه اكرب ليه
خلاني برحاته وجفه بيه يدور
يالكلك ترافة وحالي حال الظيم
ومن شدة جمالك بيك اظل مسحور
ما شايف شبيهك حته اوصفك بيه
جف ميزانك ايدك والمقابل حور
ماشوف البشر كلهم شلع لو جيت
واشوفك لو غبت وعيوني شوك تفور
وامد جفي علة طولك وانته ما موجود
واشك لو ما لمستك بالزند مبتور
واحس موجود حبك بيه من زمان
وذا تاه الوصف من زمن دار ودور
شوصف صورتك وارسم عله الحيطان
يالرسمك عذاب بجرحي ظل محفور
ولأن بعيوني ردتك صرت اجمل جروح
حته بكيفي اشوفك بالجرح منشور
لو اوصف جمالك وانته عينك لليل
رمشك بابلي وعينك حضارة اور
مثل قانون حبك يفرض علة الناس
وذا شافوك صاحو يسقط الدستور
يالرمشة عيونك بيهه الف تعبير
وبالتفسير ادوخ وما كلت معذور
يالدموعك مطر بس ما وراهن غيم
اجن مثل النده ودم الورد مهدور
يا عطر الورد بجروحي لهفه عليك
وبحظي شكثر ظل يفتر الناعور
ساكن وسط روحي وما تموت وياي
عمر حبك دهر وايامي بيهه قصور
ساعة شوفتك رمشة بطرف تنقاس
بس لحظة غيابك تنحسب بشهور
حظ وبخت عندك والله شارة عليك
وبجدحة عيونك تعت*** انذور
وامر من الصخر حالي بكثر ماكول
لاجن ما كلت والحال ظل مستور
وصفولي الصبر بفراكك اتناساك
مايدرون يمك عالصبر مكدور
وآنه اتوسلك بغيابك تمر طيف
بس اعمه طلعت بالحلم وانته النور
نور مغشي روحة من الجدم للراس
بس متغشي حيلة بخام يمكن تور
دمع كصتي نزل والخجل حل وياك
يالدمك عسل وآنه بأمل محظور
ادك عالراس يمك والطم من تروح
وانعة عليك روحي وماكلت مأجور
واخيّط عيني بيك وظلك امشي وياه
واتخنس وراك شما تلف وتدور
يمكن راح ابطل من هواك وحيف
تاليتي من اذبهه وياك عالساطور
واهد عليك وجرح روحي من الكاك
وأحط بكتار جرحي السدر والكافور
واتعاتب وياك وعيني كلهه دموع
واجر اقسام جفني واترس الشاجور
وارميلك طلق بس مو فشك بوسات !!!
مختومه بأحبك من كلب مقهور
وانيشن فوك خدك وآنه اطيح بساع
واظل رغم الخساير بالعشك منصور
بطران اليعوفك راح اكلك ليش
لأن شاطي الحزن بجفاك يجزي بحور
وانه مسودن عشك واستعدل من اهواك
ولو ادري النتيجه بعشرتك مغدور
الرئيسية 
